БНСУ-д өдөрт шинээр илэрсэн “COVID-19” халдварын тохиолдол, биеийн байдал хүнд өвчтөнүүдийн тоо мягмар гарагт хамгийн өндөр үзүүлэлтэд хүрсэнтэй холбоотойгоор Засгийн газар “COVID-19”-тэй тэмцэх төлөвлөгөөг хэрэгжүүлэх эсэх талаар хэлэлцэж байна.
Ерөнхий сайд Ким Бу Кюм улс орон хэвийн байдалдаа эргэн шилжихэд эхний саад тотгор тулгараад байгааг онцлоод, эрүүл мэндийн байгууллагуудад халдварыг хяналтад авах арга хэмжээнүүдээ эрчимжүүлэхийг уриалжээ. Мөн 52 сая хүн амын тэн хагас нь оршин суудаг Сөүл хотын бүсэд онцгой байдал үүсээд байна гэжээ.
БНСУ-д сүүлийн 24 цагийн хугацаанд халдварын 4116 тохиолдол илэрсэн нь өнгөрсөн оны нэгдүгээр сард анхны тохиолдол батлагдсанаас хойш өдөрт бүртгэгдсэн хамгийн өндөр үзүүлэлт болжээ. Тэдгээр тохиолдлын 4088 нь дотоодод халдварлажээ. Ингэснээр халдварын нийт тохиолдлын тоо 425 065-д хүрсэн гэж Солонгосын Өвчинд хяналт тавих, урьдчилан сэргийлэх төв мэдээлжээ.
Мөн “COVID-19”-өөр халдварласан хүнд өвчтөнүүдийн тоо хамгийн олон буюу 586-д хүрсэн байна. Түүнчлэн мягмар гарагт 35 өвчтөн халдвараар нас барсан нь долоодугаар сард цар тахлын дөрөв дэх давлагаа эхэлснээс хойд өдөрт бүртгэгдсэн хамгийн өндөр үзүүлэлт болжээ. Өнөөдрийн байдлаар халдварын улмаас нийт 3363 хүн нас барсан нь нийт тохиолдлын 0.79 хувьтай тэнцэж байна.
Засгийн газар хүн амаа хэвийн амьдралд нь аажмаар эргэн оруулах зорилго бүхий гурван шатлалт “COVID-19”-тэй дасан зохицож амьдрах стратегийг 11 дүгээр сарын 1-нээс хэрэгжүүлж, үүний хүрээнд халдвартай тэмцэх хязгаарлалтын арга хэмжээнүүдийг сулруулж эхэлснээс хойш өдөрт шинээр бүртгэгдэх халдварын тохиолдлын тоо нэмэгдэж эхэлжээ.
Эрх баригчид 12 дугаар сарын дунд үеэс энэхүү төлөвлөгөөний хоёрдугаар үе шатыг хэрэгжүүлэхээр төлөвлөж байсан боловч халдварын үзүүлэлтүүд энэ эрчээрээ нэмэгдсэн хэвээр байвал урьдчилан төлөвлөсөн арга хэмжээнүүдийг хэрэгжүүлэх боломжгүй гэдгийг эрүүл мэндийн байгууллагын удирдлагууд анхааруулаад байна.
Эрүүл мэндийн байгууллагуудын мэдээлснээр, Сөүл болон тус хотын эргэн тойрны бүсэд мягмар гаргийн 17 цагийн байдлаар биеийн байдал хүнд өвчтөнүүдийг хэвтүүлэн эмчлэх орны 83.3 хувь нь дүүрсэн байна. Мягмар гарагт шинээр илэрсэн тохиолдлуудын 70 хувь нь Сөүлийн бүсэд бүртгэгджээ.
Тодруулбал, Сөүлд 1730, Гёнги мужид 1176, Инчеон хотод 219 тохиолдол тус тус илэрчээ. Улсын хэмжээнд өнөөдрийн байдлаар 43.32 сая хүн буюу хүн амын 82.4 хувь нь “COVID-19”-ийн вакцины эхний тунд, 40.63 сая хүн /79.1 хувь/ бүрэн тунд хамрагдаад байна.
Э.Хулан
Эх сурвалж: "Монцамэ" агентлаг
