Тамхи татах нь бие махбодид маш их хор хөнөөлтэй тул хүний дархлааны системийг өөрчилж, тамхинаас гарсан ч илүү олон өвчин, халдварт өртөмтгий болгодгийг нэгэн шинэ судалгаагаар тогтоожээ.
Хэдийгээр 1960-аад оноос хойш тамхины хэрэглээ буурч байгаа ч АНУ-д жил бүр 480 мянга гаруй хүн тамхинаас үүдэлтэйгээр нас барж, урьдчилан сэргийлэх боломжтой нас баралтын тэргүүлэх шалтгаан хэвээр байна. Хэдэн арван жилийн турш эрүүл мэндийн ажилтнууд тамхи татдаг хүмүүст энэ зуршил нь уушигны хорт хавдар, зүрхний шигдээс, цус харвалт зэрэг ноцтой асуудалд хүргэдэг гэдгийг анхааруулсаар ирсэн билээ.
Тамхи татах нь бие махбодийн халдвартай тэмцэх чадварыг бууруулж, ревматоид артрит, чонон хөрвөс зэрэг үрэвсэлт архаг өвчин тусах эрсдэлийг нэмэгдүүлдэг байна. Парисын Пастерийн институтын биологийн мэргэжилтэн, судалгааны хамтран зохиогч, доктор Виолаин Сен-Андре "Тамхи татахаа аль болох хурдан зогсоо. Бидний судалгааны гол мессеж бол ялангуяа залуучуудад тамхи татахгүй байх урт хугацааны дархлааг бий болгох юм” гэжээ.
Эрдэмтэд 20-69 насны 1000 эрүүл хүний цусны дээжинд судалгаа хийжээ. Судалгаанд хамрагдсан тамхичид тамхинаас гарах үед тэдний дархлааны хариу урвал нэг түвшинд сайжирсан ч олон жилийн турш бүрэн сэргэж чадаагүй гэж Пастер институтын Дархлаа судлалын нэгжийг удирддаг судалгааны хамтран зохиогч, доктор Дарраг Даффи ярьжээ. Розуэлл Паркийн хорт хавдрын хүрээлэнгийн Дархлаа судлалын тэнхимийн онкологийн профессор, доктор Ясмин Танавала “Тамхинаас гарсан ч уушигны өөрчлөлт багасдаг ч хэзээ ч өмнөх шигээ сэргэдэггүй. Тамхинаас гадна олон зүйл бидний дархлааны хариу урвалд нөлөөлдөг гэдгийг бид мэднэ. Бидний удамшлын үндэс нь бидний дархлааны хариу урвалд нөлөөлдөг. Мөн бидний биеийн жин, таргалалт нь дархлааны хариу урвалд нөлөөлдөг гэсэн нотолгоо нэмэгдэж байна" гэв.
