Эрүүл мэндийн салбарын цахим шинэчлэлийн ажлыг 2012 оноос хойш Хятадын талын хөрөнгө оруулалттайгаар хийгдэж байгаа. Гэвч энэ шинэчлэлт нь алдаа дутагдал ихтэй, үндэсний аюулгүй байдалд нөлөөлөхүйц том асуудлыг үүсгээд байгаа юм.
Тодруулбал, уг төслийн дагуу улсын хэмжээнд нийт 48 эмнэлгийг хамраад буй мэдээллийн санд мэдээлэл нь орсон иргэдийн үйлчилгээ үзүүлсэн бүх мэдээ мэдээллийг хэдхэн минутын дотор гаднаас нь сүлжээнд халдаж хүссэн иргэдийнхээ мэдээ мэдээллийг регистрийн дугаар, овог нэрээр нь гарган ирж харж болох нөхцөл байдал үүсээд байгаа юм. Уг нь бол иргэдийн хувийн нууц болох өвчний түүхийг агуулсан тус программ, дата бааз нь хамгийн өндөр нууцлалтай байх ёстой зүйл. Гэтэл нөтбүүк ашиглаад жирийн нэг програмист залуу хандаж байгаа нь чанд нууцлал дунд байх ёстой уг мэдээлэл ямар ч хараа хяналтгүй байгааг нотолж буй юм. Энэ талаарх мэдээллийг та дараах энд дарж уншина уу.
Харин Эрүүл мэндийн яамнаас уг мэдээллийг олон нийтэд мэдээлсэн манай сайтыг худал ташаа мэдээлэл тараасан хэмээн олон нийтийн мэдээллийн хэрэгсэл болон нийгмийн сошиал сүлжээг ашиглан гүжирдсэн билээ.
Бид уг мэдэгдлийнх нь дараа хэн ч халдах боломжгүй гэх өндөр нууцлал бүхий тус дата баазыг унагаж, иргэдийн мэдээлэл алдагдах боломжтой гэдгийг олон нийтэд хүргэхийг хүссэн залуутай дахин холбогдож, өөрөөс нь албан ёсны тодруулга авч, улмаар мэдээллийн сангийн сүлжээг хэрхэн унагаж буй талаарх баримт бүхий бичлэгийг өчигдөр олон нийтэд мэдээлсэн юм. Өчигдрийн манай сайтад тавигдсан баримт бүхий мэдээллийг та бүхэн энд дарж уншина уу.
Мөн дашрамд дуулгахад уг мэдээллийг олон нийтэд хандаж мэдээлсэн залуу иргэдийн эрүүл мэндийн мэдээллийн сан алдагдаж буй талаар өнгөрсөн долоо хоногт Ерөнхий сайдын зөвлөхүүд, ажлын албаны шинжээчидтэй уулзаж танилцуулсан бөгөөд анхааралдаа авах ёстой асуудал гэдгийг хүлээн зөвшөөрч, уг асуудал дээр санал нэгдэж байжээ. Энэ аюултай нөхцөл байдлыг яаралтай таслан зогсоож, иргэдийнхээ эрүүл мэндийн мэдээллийг хамгаалах шаардлага тулгараад байна.
Тиймээс бид иргэдийн хувийн нууцад ноцтойгоор халдсан энэ асуудлаар иргэдийн байр суурийг сонслоо.
Д.Баяр: Хүний эрүүл мэнд гэдэг хувийн нууц
-Энэ талаарх мэдээллийг сонссон. Үнэн бол маш том асуудал. Хүний эрүүл мэнд гэдэг хувийн нууц. Тийм хариуцлагагүй юм хийсэн бол маш буруу бас аюултай. Ганцхан жишээ хэлэхэд, Би удамшдаг өвчин тусаад, миний өвчин удамшиж, хүүхдэд маань дамжихыг үгүйсгэхгүй. Тэгэхээр миний хүүхэдтэй суух хүн олдохгүй шүү дээ. Энэ бол энгийн наад захын жишээ.
В.Баттулга: Эрхэм төрийн түшээд минь монголынхоо ард иргэдийг бодооч ээ
-Арай үгүй байлгүй дээ. Хэрэв үнэн бол эрхэм төрийн түшээд минь монголынхоо ард иргэдийг бодооч ээ гэж аминчлан гуймаар байна. Бүх хүний мэдээлэл гадаадад гарч байгаа бол Монгол хүн үр үндэсгүй алга болж мэднэ. Энэ хүмүүс ингээд байхаар бид чинь хэнд ээ, юунд аа найдаж амьдрах болж байна аа. Үнэхээр хэлэх үг олдохгүй байна. Тэр шалгадаг хүмүүс нь яаралтай шалгаж хурдан шийдэх хэрэгтэй.
н.Батбаатар: Энэ улсад чинь одоо МОНГОЛ хүний гэх юм үлдсэнгүй
-Бидний зарж идэх бүх юмыг зарж идэж дуусаад одоо бүр Монгол улсын бүх иргэдийн мэдээллийг зарчихсан уу, арай хэтэрч байгаа юм биш үү. Энэ улсад чинь одоо МОНГОЛ хүний гэх юм үлдсэнгүй. Энэ байдлаараа байвал Монгол хүн ч гэж удахгүй байхгүй болохон, иргэдийн мэдээлэл байна гэдэг чинь тэр мэдээллийг гартаа оруулсан хүн Монгол улсын БҮХ иргэдийг яаж л бол яаж чадах нь байна шүү дээ. Энийг шийдэж зохицуулдаг газар гэж энэ улсад ер нь байна уу. Яаралтай шийдэх хэрэгтэй.
Ш.Дашдаваа: Үр хойчийн маань хамгийн чухал мэдээллийг хэн дуртай нь үзээд сууна гэхээр эмгэнээд, харамсаад барахгүй юм
-Энэ улс чинь улс байхаа болиод удаж байна шүү дээ. Ялангуяа улсын маань эрүүл мэндийн салбар хэн дуртайгийнх нь мөнгө угаадаг газар болсон. Гэхдээ мэдээлэл алдагдаж байгаа нь үнэн бол үнэхээр харамсалтай байна. Бид ч өнгөрч гэхэд үр хойчийн маань хамгийн чухал мэдээллийг хэн дуртай нь үзээд сууна гэхээр эмгэнээд, харамсаад барахгүй юм. Сайн шалгаад үнэн бол хэтэрхий оройтохоос нь өмнө таслан зогсоох хэрэгтэй.
Т.Гэрэл
