Үнэр дарагч дездорант нянг хамгийн ихээр үржүүлдэг

Бид гэр орноо цэвэрлэхдээ нойлын өрөө, үүдний дэвсгэр зэргийг хамгийн бохир хэмээн бодож, тэр хэрээрээ нооль, үүд зэргээ аль болох сайн цэвэрлэхийг хичээдэг. Гэвч та бидний төсөөлөн боддогоос огт өөр эд юмс хамгийн их бохир байдгийг мэргэжлийн хүмүүс судалж, тогтоожээ. Ингээд танай гэрийн хамгийн бохир арван газар, эд зүйлс юу болохыг сонирхуулъя. Мэдээд авчихвал цэвэрлэгээ хийхэд амар шүү дээ. Зарим хүний гайхал хачирхал төрнө гэдэгт итгэлтэй байна.

Гэрийн эзэгтэй нар байнга ус гоожуулж юм хийдэг болохоор гал тогооныхоо угаалтуурыг үргэлж цэвэрхэн байдаг. Манай гэрийн хамгийн цэвэрхэн орчин хэмээн боддог. Гэвч мэргэжлийн хүмүүс өндөр хүчин чадалтай микроскопийн тусламжтай судалж тогтоосноор тийм биш байжээ.Үргэлж хоолны үлдэгдэл, элдвийн хаягдал зэрэг урсан орж байдаг гал тогооны угаалтуурын орчин дахь нян бохирын хэмжээ тун ч өндөр үзүүлэлттэй гарсан гэнэ. Тиймээс энэ судалгааг хийсэн мэргэжилтнүүд эзэгтэй таныг гал тогооныхоо угаалтуурыг зориулалтын цэвэрлэгч бодисоор тогтмол угаахыг зөвлөж байна. Хоолны үлдэгдлээс гадна хүний аман дахь нян бактер зэрэг элдвийн өвчин үүсгэгч танай гал тогооны угаалтууранд тогтмол үржиж байдгийг тогтоожээ.

Ихэнх эзэгтэй нар гэрийнхээ үүдний болон дотор хаалгануудын бариулыг жилдээ тоотой ганц хоёрхон удаа арчиж цэвэрлэдэг гэдгээ хүлээн зөвшөөрчээ. Гэтэл судалгаагаар хүний гар цаг, минут тутамд хүрч байдаг хаалганы бариулан дахь нян бактерийн хэмжээ маш өндөр гарсан байна.Шалтгаан нь мэдээж өрхийн гишүүдийн бохир гар. Тиймээс хаалганы бариулаа халуун усанд норгосон чийгтэй алчуураар арчиж байхыг зөвлөе. Ингэхдээ заавал ариутгагч бодис хэрэглэх шаардлагагүй аж.

Хэрэв танайх нялх хүүхэдтэй. Тэгээд хүүхэд тань тусдаа хүүхдийн оронд унтдаг бол танай гэрийн хамгийн бохир хэсгүүдийн тоонд тэр ор заавал багтаж таарах нь. Учир нь нялх хүүхэд шээж, баахаас эхсүүлээд памперсийг нь солих зэрэг олон үйл явдал орон дотор нь өрнөдөг учраас тэр. Судлаачид нялх хүүхдийн ор болон түүний эргэн тойрноос хангалттай их хэмжээний нянг илрүүлжээ.

Ор дангаараа биш, харин орон дээрх хөнжил, даавуу, дэр, тэр битгий хэл хүүхдийн амыг нь арчдаг даавуу хүртэл их хэмжээний бактер үржих таатай орчин болдгийг мэргэжилтнүүд сануулж байна. Тиймээс ямар нэгэн ариутгагч бодисгүй чийгтэй алчуураар өдөр бүр хүүхдийнхээ орыг арчиж, мөн хөнжил, дэр зэргийг нь тогтмол сольж байхыг зөвлөе. Ялангуяа амны алчуур орчин цагт хоцрогдсон тул зөөлөн сальфетка хэрэглэх хэрэгтэй шүү.

Учир нь хүмүүс хоол хүнсээ халаах, шарах, гэсгээх тоолондоо араас нь шарах шүүгээгээ цэвэрлээд байдаггүй нь мэдээж.

Шарах шүүгээн доторх бохирдлын хэмжээ олон хоног угаагаагүй нүүр гарын алчуурнаас  ч өндөр гарсныг мэргэжлийн хүмүүс сануулж байна. Тиймээс болж өгвөл ойр ойрхон шарах шүүгээ буюу кэйчээ цэвэрлэж байхыг зөвлөе.

Гэрийн эзэгтэй нар угаалгын өрөөгөө хамгаас цэвэрхэн хэмээн боддог нь том эндүүрэл гэнэ. Судалгаанд хамрагдсан хэдэн арван айлын угаалгын өрөөний хана их хэмжээний нянгийн бохирдолтой гарчээ. Үүнд нөлөөлдөг хамгийн гол хүчин зүйл нь үнэр дарагч агааржуулагч буюу дездорант гэдгийг ч тогтоожээ. Тиймээс угаалгын өрөөгөө цэвэрлэхдээ ханыг нь бас цэвэрлэхэд буруудахгүй юм шүү.

Тийм ээ. Шал бол танай гэрийн тогтмол цэвэрлэх ёстой хэсэг яалт ч үгүй мөн. Шал яагаад нян бактер үржүүлэгч гол орчин гэдгийг тайлбарлах нь илүүц биз. Гэвч хачирхалтай нь судалгааг хийсэн мэргэжилтнүүд шалан дээрх нян бактерийг тийм бага хэмжээтэй гарах юм чинээ төсөөлөөгүй гэнэ лээ.

Гэрээ долоо хоногт тогтмол нэг удаа цэвэрлэдэг айлын шалан дээрх бактерийн хэмжээ угаалгын өрөөний хана, хаалганы бариул зэрэг дээрх бактерийн хэмжээнээс хамаагүй бага гарсан нь сонин л юм.

Харин одоо нохой тэжээдэг хүмүүс наашаа анхаарлаа хандуулна уу. Таны хайртай үнэнч андын тань хэвтэр, хоолны таваг хоёр гэрийн чинь хамгийн бохир, тэгээд бас энд тэндгүй халдвар тараагч гол эд зүйлд тооцогдох нь байна шүү.

Энэ орчин дахь нянгийн хэмжээ бусад ямар ч эд зүйлсээс илүү өндөр гарсныг сануулчихъя. Дээр нь нохой тэжээдэг айлын шал, хивс, хана туурга, тэр ч бүү хэл хүүхдийн өрөөнийх нь эд хэрэгслүүд хэзээ ч цэвэрхэн байдаггүйг мэргэжлийн хүмүүс сүүлийн үеийн боловсронгуй микроскопийн тусламжтайгаар тогтоочихож дээ.

Нохой биш, муур тэжээдэг шүү дээ. Муур чинь нохойноос хамаагүй цэвэрхэн амьтан хэмээн маргах гэж байгаа бол тийм биш гэдгийг бас л дээрх судалгаагаар тогтоож. Муурны хамгийн их очиж хэвтэх дуртай газрууд, хоолны идүүр, бусад эд хэрэгсэл хэзээ ч нян бактерийг өөртөө агуулахгүй байна гэж байдаггүй аж.

Мэргэжилтнүүдийн хамгийн их бохирдолтой байх ёстой гэж тооцсон нойлын суултуур хамгийн бага бохирдолтой гарсан нь сонин юм шүү.

Мэдээж зохих хэмжээний бичил нянгууд нойлын суултуурт агуулагддаг болох нь тогтоогдсон л доо. Гэхдээ бидний болон судлаачдын төсөөлснөөс хамаагүй бага.

Бид нойлын суултуур, нойлын өрөөний шал зэргийг хамгийн бохир хэмээн боддог нь эндүүрэл гэдгийг дээрх судалгаа харууллаа. Угаалгын өрөөний суултуур, шал зэргээс илүүтэй угаалгын машин, мөн саван, сойз зэргээ тавьдаг тавиур, дээр нь угаалгын өрөөний хана төсөөлснөөс ч илүү бохир байдаг аж.

Үүнээс гадна нүүр гараа арчсан алчуур, алчуурны хатаагч зэргийг нэмэх хэрэгтэйг мэргэжлийн хүмүүс сануулллаа. Тиймээс нян бактергүй цэвэрхэн амьдаръя гэвэл эдгээр эд зүйлсээ байнга цэвэрлэх л хэрэгтэй болж дээ, эзэгтэй минь.