Оны төгсгөл гэхэд эм, эмнэлгийн хэрэгсэл нөөцгүй болох эрсдэл үүсжээ

Монголын эм зүйн байгууллагуудын нэгдсэн “Эм” холбоо эм болон эмнэлгийн хэрэгслийн нийлүүлэлтийг зогсоохоос өөр аргагүй нөхцөл байдалд хүрснээ мэдэгдээд байгаа билээ. Тус холбооноос мэдээлснээр эм хангамжийн байгууллагууд олон жилийн турш эмнэлэг, эрүүл мэндийн байгууллагуудыг шаардлагатай эм, хэрэгслээр жигд, тасралтгүй хангаж ирсэн боловч төлбөр тооцоо гэрээнд заасан хугацаандаа бүрэн хийгдээгүйгээс их хэмжээний он дамжсан өр авлага бий болсон байна. Өнөөдрийг хүртэл энэ өр барагдаагүйгээс гадна 2025 оны төлбөрийн үүрэг нэмэгдсэн нь эм хангамжийн байгууллагуудын санхүүгийн чадавхыг доройтуулж, хэвийн тогтвортой үйл ажиллагааг нь алдагдуулжээ. Үүний улмаас эм, эмнэлгийн хэрэгслийн тасалдал үүсэх ноцтой нөхцөл бүрдсэн байна.

Эмнэлгүүдийн төлөөгүй төлбөр салбарын нийт эргэлтийн хөрөнгийн 40 хувийг эзэлж байгаа нь зөвхөн эмийн хангамж төдийгүй эрүүл мэндийн салбар бүхэлдээ доголдох бодит эрсдэлийг бий болгожээ. Иймээс эм хангамжийн байгууллагууд яаралтай тусламж болон амь тэнссэн өвчтөнд шаардлагатай эм, хэрэгслээс бусдыг нийлүүлэхийг түр зогсоох арга хэмжээг авч хэрэгжүүлэхээс өөр аргагүйд хүрсэн байна. Энэ асуудлын талаар “Эм” холбооны гүйцэтгэх захирал И.Балжинням тайлбар өглөө.

Тэрээр "Эм хангамжийн байгууллагууд тендерийн хуулийн дагуу эмнэлгүүдийг шаардлагатай эм, эмнэлгийн хэрэгслээр тогтмол хангаж ирсэн ч төлбөрөө цагт нь барагдуулаагүйн улмаас их хэмжээний өр бий болж, салбарын үйл ажиллагаа доголдох түвшинд хүрээд байна. Сүүлийн 4-5 жилийн хугацаанд энэ асуудлыг холбогдох байгууллагуудад удаа дараа мэдэгдэж, шийдвэрлүүлэхээр ажиллаж ирсэн боловч дорвитой үр дүнд хүрээгүй юм. Сүүлийн жилүүдэд эм, эмнэлгийн хэрэгслийн нийлүүлэлтийг арилжааны банкны зээлээр санхүүжүүлж байсан ч одоо зээл авах боломжгүй болсон бөгөөд хэрэв нөхцөл байдал хэвээр үргэлжилбэл оны төгсгөл гэхэд салбар бүрэн тэг зогсолт хийхээр байна. Мөн гадаадын ханган нийлүүлэгчидтэй байгуулсан зарим гэрээ цуцлагдаж, илүү хатуу, ашиггүй нөхцөл тулгарч байгаа юм. Түүнчлэн өрийн асуудал шийдэгдсэн ч эм, эмнэлгийн хэрэгслийн нөөц шууд бүрдэх боломжгүй бөгөөд үйлдвэрлэгдэж, Монгол Улсад орж иртэл дор хаяж 60 хоног шаардлагатай. Тиймээс оны төгсгөлд эм, эмнэлгийн хэрэгслийн дутагдал үүсэх бодит эрсдэл өндөр байгаа юм" гэлээ.

Share on Facebook Share on Twitter

Оны төгсгөл гэхэд эм, эмнэлгийн хэрэгсэл нөөцгүй болох эрсдэл үүсжээ

Холбоотой мэдээ