Д.ЭНХЭЭ
-Үүнтэй холбогдуулан эрдэмтэд биеийн эрүүл жинг 30 нас хүртэл, түүнээс цааш ч мөн хадгалах хэрэгтэй болохыг тэмдэглэж байна-
Нас тогтсон үед хүмүүсийн биеийн жин аажмаар нэмэгдэх нь зарим төрлийн хорт хавдар үүсэх эрсдлийг 30-50 хувь ихэсгэдэг. Үүнийг Австралийн Виктория мужийн хорт хавдартай тэмцэх зөвлөлийн явуулсан судалгааны үр дүн харуулсан бөгөөд тус байгууллагын албан ёсны сайтад нийтлэгдсэн ажээ.
Нас ахисан хойноо ч биеийн эрүүл жингээ хадгалсаар байгаа хүмүүсийг бодвол биеийнх нь жин 30 нас хүртлээ тогтвортой байж байгаад дараа нь аажмаар нэмэгдсэн хүмүүсийн хувьд хорт хавдар үүсэх эрсдэл ихэсдэг болохыг Австралийн эмч нар илрүүлжээ. Хавдрын тархалт судлалын хэлтсийн удирдагч Рожер Милний өгүүлснээр эрдэмтэд өөрсдийн дүгнэлтээ гаргахдаа Виктория мужийн улсын эмнэлгээр үйлчлүүлсэн 30,5 мянган хүнийг олон жилийн турш ажигласны үр дүнд гаргаж авсан баримтад тулгуурласан ажээ.
“Насан турш биеийн эрүүл жингээ хадгалсан болон залуудаа хэвийн жинтэй байж байгаад нас ахих тусам мэдэгдэхүйц жин нэмсэн хүмүүсийн үзүүлэлтүүдийг бид харьцуулж үзсэн. 27 жилийн турш үргэлжилсэн судалгааны явцад бид биеийн жингийн индекс (БЖИ) ихсэх тусам таргалалттай холбоотой 13 төрлийн хорт хавдар үүсэх эрсдэл ихэсч байгаа болохыг илрүүлсэн. Илүүдэл жинтэй үйлчлүүлэгчдийн эрсдэл 30 хувь, “таргалалт” хэмээх оноштой өвчтнүүдийн бүр 50 хувь ихэсч байсан” хэмээн Милн тайлбарлав.
Зарим төрлийн хорт хавдраас сэргийлэхийн тулд биеийн жингээ хянах явдал чухал болохыг судалгааны дүн харуулж байна хэмээн хорт хавдартай тэмцэх зөвлөлийн ерөнхий захирал Тодд Харлер онцлов. “Бидний судалснаар Австрали дахь хор хавдрын 3,9 мянга орчим тохиолдол нь илүүдэл жинтэй үйлчлүүлэгчидтэй холбоотой болохоор бидний эрүүл мэндэд илүүдэл жин эрсдэл учруулж байгааг үгүйсгэх аргагүй юм” хэмээн Харлер онцолжээ. Насан турш биеийн эрүүл жингээ хадгалах явдал чухал болохыг иймэрхүү судалгаа сануулж байна хэмээн тэрээр нэмж өгүүлэв.
Биеийн жингийн индекс (БЖИ) бол хүний биеийн жинг өндөртэй нь харьцуулан зохистой эсэхийг тусгай томьёогоор тодруулдаг хэмжээ билээ. Энэ бол хүний биеийн жин хэр зэрэг эрүүл болохыг харуулдаг үзүүлэлт юм. Биеийн жингийн индексийг “биеийн жингийн дутагдлаас” “хэт хурдан таргалалт” хүртэлх цар хүрээнд тоон илэрхийллээр гаргасан байдаг. Оношлогоо, эмчилгээнд энэ үзүүлэлт чухал байдаг.
