Наршсан үед яах ёстой вэ?

Зуны улиралд, гадаа хурц наранд удаан ажиллах, алхах үед нарших асуудал тулгардаг. Тэр дундаа бага насны хүүхдүүд, томчуудаас илүү хурдан нарны хордлого авдаг. Тиймээс хурц нартай халуун өдөр хүүхдүүдээ аль болох гэрээс гаргахгүй байх, зайлшгүй шаардлагатай тохилдолд наршихаас сэргийлэх аргуудыг хэрэглэж байгаарай. Бид энэ удаа та бүхэндээ наршихаас сэргийлэх, наршсан тохилдолд яах хэрэгтэй тухай зөвлөгөөг хүргэж байна.

Халуун нар төөнөж байгаа орчинд удаан хугацаагаар ажиллаж, аялж байгаа хүмүүс биед хуримтлагдсан халууны хэмжээг гадагшлуулахгүй бол биеийн халууны зохицуулалт алдагддаг. Заримдаа халууны хэмжээ өндөр хэмжээнд хүрээгүй ч нас ахисан, бие тааруухан, ядаргаа ихэссэн, их таргалсан, архи уусан, өлсөж цангасан, ус давс дутагдсан, халуунтай, зүрх судасны өвчин, чихрийн шижин зэрэг нь нарших өвчинд нэрвэгдэхийн гол шалтгаан болдог байна.

Аль болох сэрүүн газар очиж, чадах чинээгээрээ сэрүүцэх хэрэгтэй. Гадуур хоолонд орох, амрахаар зэхэж байгаа бол сэрүүцүүлэгчтэй газрыг сонгоорой. Энэ нь танд болон танай гэр бүлд илүү тухтай байх болно.

Мэдээж гадаа халуун, бүгчим байхад зузаан цамц, хувцас нь биед маш ихээр төвөг учруулж, ядраадаг. Тиймээс аль болох түүнээс салж, биед эвтэйхэн, хөлс гаргахгүй, агаар сайн нэвтрүүлдэг цэвэр даавуун хөнгөн хувцсыг сонгох нь зүйтэй.

Нарны хордлого авсан бол юун түрүүнд, орон дээр хөлөө сойн хэвтээрэй. Хөлнөөсөө сэрүүцэхийн тулд сэнс тавьж болно. Мөн хүйтэн усаар толгой дээрээ жин тавих, бүлээвтэр хүйтэн усанд бүх биеэрээ орох зэрэг энгийн аргуудыг хэрэглэнэ.

Нарших нь хордлогын нэгэн хэлбэр учраас бөөлжих, толгой өвдөх, бие хямрах зэрэг шинж тэмдгүүд илэрдэг. Тиймээс хордлого тайлах хросолыг бага багаар уух хэрэгтэй. Гэрийн нөхцөлд давс болон элсэн чихрийн тусламжтай бэлдэж болдог. Хамгийн гол нь бүлээнээр нь уух хэрэгтэй шүү.

Биеэ сэрүүцүүлж, зовиурыг багасгахын тулд, юун түрүүнд бага зэрэг хүйтэн бүлээн усанд алчуур базаж, бүхий л биеэ арчиж, жин тавих хэрэгтэй. Ингэснээр зовиур багасаж, бие сэргэх болно.

Зурагт үзүүлсэнтэй адил биеийн халуун хэсгүүдийг сэрүүцүүлж, хөргөх хэрэгтэй. Хүзүү, суга, цавь, хөлийн ул, тавхайг энэ мэт сэрүүцүүлснээр бие хөнгөрч, илүү ихээр амардаг.

Хэрвээ өвдөлт буурахгүй, толгой маш ихээр өвдөж байгаа бол толгойн болон өвчин намдаах эмийг уух хэрэгтэй. Ингэснээр өвчин даамжрах, өөрт мэдрэгдэх зовиурыг эрс багасгадаг.

Хэдийгээр өвдөлт намдахгүй, шинж тэмдэг буурахгүй бол өвчин намдаах, толгойн эмийг ууж болох ч, эмчийн зааваргүйгээр дур мэдэн хүчтэй эм уухаас болгоомжлох хэрэгтэй. Энэ нь бүр ч илүү сөрөг үр дагаварт хүргэж болно.

Хэрэв байдал дээрдэхгүй бол мэргэжлийн эмчид хандаж, зөвлөгөө тусламж хүсэх хэрэгтэй. Үзүүлэхгүй удсанаас бөөлжилт ихсэх, толгой эргэж өвдөх, хоолны дуршил буурах зэрэг олон сөрөг нөлөөтэй.

Наршсан хүнийг хэвтүүлэх, боломжгүй бол суулгаж, аль болох тайвшруулах хэрэгтэй. Бие, мөр, хүзүү хэсгийн чилээг гаргах нь цусны эргэлтийг түргэсгэн, хурдан тэнхрэхэд тусалдаг. Булчингуудыг зөөлөн илж, иллэг хийгээрэй.

Цусны даралт ихтэй өндөр настай хүмүүс, бага насны хүүхдүүд, бие давхар эхчүүд, гадаа ажиллаж байгаа хүмүүс өндөр эрсдэлтэй байдаг. Тиймээс тэдгээр хүмүүс нарны хаалт, саравчыг зүүх, хүйтэн бүлээн алчуураар тогтмол жин тавих, шингэн зүйл сайтар уух зэргээр урьдчилан сэргийлэх нь зөв юм. 

Хэрвээ гадаа +25 хэмээс халуун, үүлгүй, хурц нартай бол аль болох гэрээсээ гарахгүй байх, сүүдэрт байх хэрэгтэй. Мөн аль болох цэвэр даавуун нимгэн цамц, даашинз өмсөх, өөрийгөө нарны хорт туяанаас хамгаалахыг хичээгээрэй.

Хамгийн чухал нь та гадаа ил, нарны гэрэл шууд тусч байх газарт удаан суух хэрэггүй юм. Аль болох сүүдэртэй, сэрүүн газар бараадаж, нарны шил, малгайгаа марталгүй өмсөөрэй.

Наршсан тохиолдолд шээснийхээ өнгийг ажиглах хэрэгтэй. Хэвийн шээс, цайвар шаргал өнгөтэй, элдэв булингар, үнэргүй байдаг. Шээс хурц үнэртэй болох, булингартаж, хүрэн шар болох нь аливаа өвчний хамгийн энгийн шинж тэмдэг юм. 

Халуун өдөр машин дотроо савтай ус, ундаа мартах, эсвэл гадаа халуунд ундаа жүүсээ мартсан бол түүнээс битгий уугаарай. Учир нь тэдгээрээс болж бие хордон, хямрах өндөр эрсдэлтэй.