Судалгаа: Сахар орлуулагч цус харвах, зүрх судасны өвчнөөр нас барах эрсдэлийг нэмэгдүүлдэг

Элсэн чихэр орлуулагчийн аюулгүй байдал дахин эргэлзээ төрүүлж эхлээд байна.

Кливленд клиникээр ахлуулсан судлаачид илчлэг багатай сахар орлуулагч ксилитолыг зүрхний шигдээс, цус харвалт эсвэл зүрх судасны өвчнөөр нас барах эрсдэлтэй холбоотой гэж үзсэн талаар Европын зүрхний сэтгүүлд нийтэлсэн судалгаанд дурджээ.

Уг бүтээгдэхүүний хувьд элсэн чихэр шиг харагддаг, адил амттай боловч 40 хувиар бага илчлэгтэй байдаг. Европт "кето ээлтэй" гэсэн шошготой бүтээгдэхүүн бүр сахар оруулагчийг ашигласан байдаг аж. Таргалалтын түвшин нэмэгдэж байгаатай холбогдуулан сүүлийн 10 жилийн хугацаанд элсэн чихэр орлуулагчийн хэрэглээ ихээхэн нэмэгдсэн.

"Сахар орлуулагчийг хамгийн их хэрэглэж байгаа хүмүүс нь зүрхний шигдээс, цус харвах эрсдэлд хамгийн их өртдөг" гэж “Cleveland Clinic”-ийн Лернер судалгааны хүрээлэнгийн зүрх судас, бодисын солилцооны тасгийн дарга Станли Хазен онцолжээ.

Судалгааны баг хүмүүсийн зүрх судасны эрсдэлийг урьдчилан таамаглахын тулд хүний биед байдаг чихрийн спиртийг судалж эхэлсэн байна. Судалгааны явцад судлаачид шөнийн цагаар мацаг барьсан 3000 гаруй оролцогчдын цусан дахь байгалийн гаралтай ксилитийн түвшинг хэмжсэн байна. Судалгааны бүлгийн 25 хувьд багтаж буй ксилитийн түвшин өндөр хүмүүс дараагийн гурван жилийн хугацаанд зүрхний шигдээс, цус харвалт эсвэл нас барах эрсдэл нь бусад хүмүүстэй харьцуулахад ойролцоогоор хоёр дахин их байгааг тэд тогтоожээ.

Судлаачид хулгануудыг ксилитолоор хооллож, лабораторид цус, сийвэн дээр нэмээд эрүүл сайн дурын 10 хүнд ксилит агуулсан ундаа өгчээ. Эдгээр бүх тохиолдолд ксилит нь цусны бүлэгнэлтийг хянадаг цусны бүрэлдэхүүн хэсэг болох ялтасыг идэвхжүүлж байжээ. Цусны бүлэгнэл нь зүрхний шигдээс, цус харвалтын гол шалтгаан болдог. Баруун Хойд Анагаах ухааны Блюмын Зүрх судасны хүрээлэнгийн зүрх судасны эмч, Баруун хойд Файнбергийн Анагаах ухааны сургуулийн зүрх судасны эпидемиологийн профессор, доктор Садия Хан “Нэгдүгээрт, хүмүүсийн цусан дахь байгалийн гаралтай ксилитийн судалгаа нь ажиглалтын шинж чанартай байсан бөгөөд зөвхөн сахар орлуулагч болон зүрхний эрсдлийн хоорондын хамаарлыг харуулж чадна.

Энэ нь ксилитол нь зүрхний шигдээс, цус харвалт, үхэлд хүргэдэг болохыг шууд харуулж чадахгүй байна. Гэсэн хэдий ч баримт бичигт дурдсан бүх нотлох баримтыг харгалзан үзвэл хиймэл чихрийн хэрэглээг хязгаарлах нь зүйтэй болов уу. Магадгүй хариулт нь элсэн чихрийг хиймэл чихрээр орлуулах биш, харин хүнсний ногоо, жимс жимсгэнэ гэх мэт өндөр чанартай хүнсний бүрэлдэхүүн хэсгүүдийг байгалийн элсэн чихэр болгон ашиглах талаар бодох хэрэгтэй" хэмээжээ.

Эх сурвалж: CNBC

Share on Facebook Share on Twitter