Судалгаа: Хүүхдүүдийн дунд даралт ихсэх тохиолдол сүүлийн хорин жилд 2 дахин нэмэгджээ

Дэлхий даяар хүүхэд, өсвөр үеийнхний дунд цусны даралт ихсэлттэй болох тохиолдол сүүлийн 20 жилд бараг хоёр дахин нэмэгдсэн нь эрүүл бус хооллолт, хөдөлгөөний хомсдол, таргалалтын огцом өсөлтийн үр дүн гэж томоохон хэмжээний судалгаагаар дүгнэжээ.

Мэргэжилтнүүдийн хэлснээр насанд хүрэхээсээ өмнө даралт ихсэлттэй болсон 114 сая хүүхэд насан туршийн, үхэлд хүргэж болзошгүй олон төрлийн эрүүл мэндийн хүндрэлтэй (зүрх судасны өвчин, бөөрний өвчин зэрэг) нүүр тулж байна.

19 хүртэлх насны хүүхэд, өсвөр үеийнхний дунд даралт ихсэлтийн тархалт 3.2 хувиас 6.2 хувь болж 20 жилийн дотор бараг хоёр дахин өссөн байна. Энэ үр дүн нь 21 улсын 400,000 гаруй хүүхдийг хамарсан 96 судалгааны өгөгдлийн мета-анализаас гарч, The Lancet Child and Adolescent Health сэтгүүлд нийтлэгджээ.

Тайланд таргалалт нь хүүхдийн даралт ихсэлт болон огцом өсөлтийн “гол хүчин зүйл” болсон гэж тэмдэглэсэн байна. Таргалалттай хүүхдийн бараг 19 хувь нь даралт ихсэлттэй байгаа бол хэвийн жинтэй хүүхдүүдийн дунд энэ үзүүлэлт 3 хувиас бага байна. “Хүүхдүүдийн даралт ихсэлт 20 жилийн дотор бараг хоёр дахин өссөн нь эрүүл мэндийн байгууллагууд, эцэг эхчүүдийн хувьд ноцтой дохио” хэмээн судалгааны зохиогч, Эдинбургийн их сургуулийн дэлхийн эрүүл мэндийн судалгааны төвийн захирал проф. Игор Рудан хэлжээ.

Мөн судалгаагаар хүүхэд, өсвөр үеийн 8.2 хувь нь “предаралттай” буюу хэвийн хэмжээнээс өндөр боловч даралт ихсэлтийн оношийн түвшинд хараахан хүрээгүй үзүүлэлттэй байгаа гэж дүгнэв. Предаралт нь өсвөр насанд илүү түгээмэл бөгөөд өсвөр үеийнхний 11.8 хувь, бага насны хүүхдүүдийн 7 хувьд тохиолддог байна.

Эмч нарын хэлснээр даралт 14 нас орчимд, ялангуяа хөвгүүдийн хувьд огцом нэмэгддэг тул тогтмол даралт хэмжих нь маш чухал аж.

Мэргэжилтнүүдийн анхааруулж буй гол санаа:

Хүүхдийн таргалалт нь даралт ихсэлтийн үндсэн шалтгаан бөгөөд бүрэн урьдчилан сэргийлэх боломжтой.
Эрүүл хооллолт (жимс, ногоо, бүхэл үр), давс, сахар багасгах, тогтмол хөдөлгөөн хийх, дэлгэцийн цагийг бууруулах нь эрсдлийг мэдэгдэхүйц бууруулна.
Хэрэв гэр бүлд даралт ихсэлтийн өвчин байдаг бол хүүхдийн даралтыг тогтмол хэмжихийг зөвлөдөг.

Мэргэжилтнүүд таргалалттай холбоотой даралт ихсэлтийг эрт үед нь засах боломжтой ч, дэлхийн улс орнууд хүүхдийн таргалалттай тэмцэх бодлогоо илүү эрчимжүүлэх шаардлагатай гэж онцолж байна.

https://itoim.mn/a/2025/11/17/world/usf?23fa69d22176077b57e04d77e90b5f4c

Share on Facebook Share on Twitter