УИХ-ын Нийгмийн бодлогын байнгын хорооны хуралдаанаар “Монгол хүний удмын сангийн аюулгүй байдлыг хамгаалах, хүн амын өсөлтийг дэмжих талаар авах арга хэмжээний тухай” Улсын Их Хурлын тогтоолын төслийн талаар хэлэлцэж байна. Хэлэлцэж байгаа асуудалтай холбогдуулан гишүүд асуулт асуун хариулт авч байна.
УИХ-ын гишүүн Д.Сарангэрэл "Сүүлийн үед дэлхийн анагаах ухаанд ADHD эмгэгийн талаар их ярих боллоо. Бид анхаарал дутмагшил хэт хөдөлгөөн дэх эмгэг гэж ярьж байгаа. Гэтэл ийм эмгэгтэй хүмүүс их боллоо. Энэ талаар манай анагаах ухааны салбарынхан бараг ярихгүй байна. Энэ талаар яагаад ярихгүй, оношилохгүй, эдгээр хүүхдүүдэд дэмжлэг үзүүлэхгүй байна вэ" гэж асуулаа.
Стратеги судалгааны хүрээлэнгийн судлаач, Анагаах ухааны доктор Э.Энхмаа "Хүн ам дахь цус ойртолтын түвшин 25 жилийн үечлэлтэйгээр зузаарсаар яваад хамгийн оргил үедээ цус ойртолтын үр дагавар төрөл бүрийн байдлаар илэрдэг. Төрөл бүрийн удамшлын согог өвчнүүд янз бүрийн хэлбэрээр хүн амд илэрч байна.
Дэлхий даяар 6000 гаруй удамшлын өвчин байдгийн 2000 гаруй нь түгээмэл. Монголын хүн амд удамшлын 2000 гаруй төрлийн өвчин ямар хэмжээний ачаалалтай байгаа, хаана хэрхэн илэрч байгааг судалж чадаагүй байна. Тийм лабораторийн боломж нөхцөл бүрдээгүй" гэв.
