Хүн төрөлхтөн эрт дээр үеэс залуу хэвээр үлдэх, урт удаан наслах нууцыг эрэлхийлсээр ирсэн. Домог, үлгэрт хүртэл хүнийг дахин залуу болгодог “шидэт ундаа”-ны тухай өгүүлдэг нь үүний нэг илрэл юм. Гэвч бодит амьдрал дээр бидэнд тийм ид шидийн ундаа байхгүй ч, бие махбодыг дэмжиж, эсийн гэмтлийг бууруулж, хөгшрөлтийн явцыг удаашруулахад туслах энгийн хэрнээ үр дүнтэй ундаанууд бий. Судалгаагаар эдгээр нь зөвхөн амттайгаараа бус, эрүүл мэндэд ч эерэг нөлөөтэй болох нь батлагдсан.
1. Ус — амьдралын үндэс
Ус бол хамгийн энгийн хэрнээ хамгийн чухал “залуу хэвээр байх” ундаа юм. Биеийн бүх эсүүд уснаас хамааралтай байдаг бөгөөд хангалттай ус уухгүй бол арьс хуурайшиж, уян хатан чанараа алдаж эхэлдэг. Ус нь хорт бодисыг гадагшлуулж, бодисын солилцоог дэмжиж, арьсны өнгийг сэргээдэг. Мөн тархины үйл ажиллагаанд шууд нөлөөлж, анхаарал төвлөрөл, ой санамжийг дэмжинэ.
2. Кофе — хамгаалах нөлөөтэй ундаа
Кофе нь зөвхөн сэргээх үйлчилгээтэй биш, мөн антиоксидантаар баялаг ундаа юм. Судалгаагаар тогтмол бага хэмжээгээр кофе уух нь зарим төрлийн хавдрын эрсдэлийг бууруулж болзошгүй гэж үздэг. Кофеин нь тархины идэвхийг нэмэгдүүлж, ядаргаа багасгахад тусалдаг. Гэхдээ хэтрүүлэн хэрэглэх нь зүрх дэлсэх, нойргүйдэх зэрэг сөрөг нөлөө үзүүлэх тул өдөрт 1–2 аягаас хэтрүүлэхгүй байх нь чухал.
3. Бага хэмжээний дарс — тархинд тустай
Улаан дарс нь ресвератрол хэмээх антиоксидантаар баялаг бөгөөд энэ нь тархины эсийг хамгаалж, ой санамжийн доройтлоос сэргийлэхэд тусалдаг гэж үздэг. Бага хэмжээгээр хэрэглэх нь зүрх судасны үйл ажиллагааг дэмжих боломжтой ч, тунг хэтрүүлэхэд эсрэгээрээ бие махбодод сөрөг нөлөө үзүүлнэ. Гол нууц нь — “бага хэмжээ”.
4. Ногоон цай — хөгшрөлтийн эсрэг хамгаалагч
Ногоон цай нь эсийг гэмтээдэг исэлдэлтийн процессыг сааруулдаг хүчтэй антиоксидантуудыг агуулдаг. Энэ нь хөгшрөлтийн явцыг удаашруулж, зүрх судасны өвчнөөс сэргийлэхэд тустай. Мөн дархлааг дэмжиж, биеийн ерөнхий тэнцвэрийг хадгалахад чухал үүрэгтэй. Өдөрт 3–4 аяга ногоон цай уух нь урт хугацаанд эерэг нөлөө үзүүлдэг.
5. Какао — зүрхний хамгаалагч
Какао нь флавоноидоор баялаг бөгөөд эдгээр бодис нь судасны уян хатан байдлыг хадгалж, даралт ихсэхээс сэргийлдэг. Мөн тархины цусны эргэлтийг сайжруулж, ой санамжид эерэг нөлөө үзүүлдэг байна. Гэхдээ элсэн чихэр багатай, хар какао сонгох нь илүү ашигтай.
6. Шар буурцгийн сүү — арьсны уян хатан байдлын нууц
Шар буурцгийн сүүнд агуулагдах изофлавон нь коллаген үүсэлтийг дэмжиж, арьсыг уян хатан, толигор байлгахад тусалдаг. Мөн дааврын тэнцвэрийг дэмжиж, ялангуяа эмэгтэйчүүдийн эрүүл мэндэд эерэг нөлөө үзүүлдэг байна.
7. Улаан грейпфрутын шүүс — арьс хамгаалагч
Грейпфрут нь ликопин хэмээх хүчтэй антиоксидантаар баялаг. Энэ нь арьсыг нарны хэт ягаан туяанаас хамгаалж, эсийн гэмтлийг бууруулна. Мөн арьсны уян хатан чанарыг дэмжиж, үрчлээ үүсэх явцыг удаашруулдаг.
8. Луувангийн шүүс — ой тогтоолт сайжруулагч
Лууванд агуулагдах лютеолин нь тархины эсийг хамгаалж, ой санамжийн доройтлыг удаашруулдаг. Мөн дархлааг дэмжиж, үрэвслийн эсрэг үйлчилгээ үзүүлдэг гэдгээрээ алдартай.
9. Жүржийн шүүс — хараа хамгаалагч
Жүржийн шүүс нь С амин дэм болон лютеинээр баялаг. Энэ нь нүдийг хамгаалж, харааны тод байдлыг хадгалахад тусалдаг.
Нас ахихад үүсдэг харааны доройтлоос урьдчилан сэргийлэхэд онцгой ач холбогдолтой.
10. Хүрэн манжингийн шүүс — тархины “сэргээш”
Хүрэн манжингийн шүүс нь судас өргөсгөх үйлчилгээтэй бодисоор баялаг тул цусны эргэлтийг сайжруулахаас гадна тархинд очих хүчилтөрөгч нэмэгдэж, ой тогтоолт, анхаарал төвлөрөлтөд тань эергээр нөлөөлнө.
https://www.caak.mn/post/view/43810
