НЬЮ-ЙОРК. /Nature/. “Johnson & Johnson” компанийн мэргэжилтнүүд өөрсдийн гарган авсан коронавирусний вакциныг сармагчнууд дээр туршиж, тус вакцин нь сармагчнуудыг халдварт өвчнөөс хамгаалж байгааг олж тогтоожээ.
“Эмнэлзүйн өмнөх туршилт”-ын үеэр ийм үр дүн харуулсан талаар “Nature” сэтгүүлд нийтэлсэн байна. Нэг тун вакцин хэрэглэсний дараа дийлэнх макак-резус сармагчинд дархлаа тогтжээ.
Бэлдмэлийг АНУ, Бельгид хүмүүс дээр туршиж эхлээд байгаа тухайгаа компани дурдсан байна. Туршилтанд мянга орчим эрүүл сайн дурынхан оролцож байгаа аж. “Johnson & Johnson” компанийн мэргэжилтнүүд туршилтын 3 дугаар үе шатыг 9 дүгээр сард эхлүүлэхээр төлөвлөж байна.
“Johnson & Johnson” компанийн вакцин нь ганцхан тун байхад хангалттай гэдгээрээ сонирхол татаж байгаа юм. Сармагчингуудыг вируснээс хамгаалж байгааг харуулахын тулд ганцхан тун хангалттай байжээ. Зарим вакцины үйлчлэлийг батлахад хоёр тун шаардлагатай байдаг” гэж Цагаан ордны коронавирустэй тэмцэх асуудал хариуцсан зохицуулагч Дебора Биркс цохон тэмдэглэжээ.
Э.АянзаяаЭх сурвалж: Монцамэ агентлаг
