Таны жингээ хасаж чадахгүй байгаа шалтгаанууд

Өдөр бүр дасгал хийж, хоолоо багасгасан ч жин тань хэвэндээ л байна уу. Хэчнээн хичээсэн ч үр дүнгүй санагдаж, сэтгэлээр унаж байгаа юм биш биз. Тэгвэл та жингээ хасахдаа дараах алдаануудыг гаргаж байж болох юм.

Сайтар унтаж амрахгүй байх

Хятадад хийсэн судалгаагаар хэт их эсвэл хэт бага унтах нь таргалалтад хүргэдгийг тогтоожээ. Түүнчлэн хэт бага унтсанаар жин хасах үйл явцыг сааруулдаг байна. Насанд хүрэгчид өдөрт 7-8 цаг, өсвөр насныхан 8-10 цаг, бага насны болон нярай хүүхдүүд 9-16 цаг унтах нь хамгийн зохимжтой. Иймд та өөрт тохирсон цагаар, сайтар унтаж амрах хэрэгтэй юм.

Өглөөний цай уухгүй байх

Хэрэв та өглөөний цайгаа уухгүй бол өдрийн хоолны үеэр илүү их өлссөн мэдрэмж авч, хэвийн хэмжээнээс их идэх магадлалтай. Иймд өглөө боссоноосоо хойш нэг цагийн дотор өглөөний цайгаа ууж хэвшээрэй. Мөн бүхэл үрийн талх, өндөг, овьёос, гадил зэрэг хүнсийг санал болгож байна.

Хэт их стресстэх

Стресс нь бидний бие дэх кортизолын хэмжээг ихэсгэж, улмаар батга гарах, хэвлий хэсгээр таргалах, мөр, нуруу хөших, анхаарал төвлөрөлт муудах, сарын тэмдэг алдагдах зэрэг олон сөрөг үр дагавартай. Түүнчлэн стресстэх үед хүний бие махбод өөх тос, сахар зэргийг их хэмжээгээр хүсэж, их идэх дуршилд хөтөлдөг. Тиймээс та ном унших, буддаг ном будах, бясалгах, ууланд алхах зэрэг зөв аргаар стрессээ тайлаарай.

Биеийн онцлог

Ясны хэмжээ том байж болох ч энэ нь таргалалттай шууд холбогддоггүй гэдгийг Америкийн судлаачид 2021 онд нотолжээ. Иймд таны ясны хэмжээ жин хасахад тийм ч их саад болохгүй гэсэн үг.

Харин таны хоол боловсруулах чадвар удаан эсвэл хурдан байхаас хамаараад жин хасах үйл явцад ихээхэн нөлөөлдөг ажээ. Удамшил, хөгшрөлтөөс үүдэн зарим хүний хоол боловсруулах ажиллагаа удаан байдаг. Энэ тохиолдолд эслэгээр баялаг хоол хүнс хэрэглэж, өдөр тутамдаа ус уун, дасгал хөдөлгөөн хийх нь маш үр дүнтэй.

Хооллолтын буруу хэв маяг

Хэрэв та хэт хурдан иддэг бол жин хасах үйл явц тань төдий чинээ удаан байх болно. Иймд хоол идэхдээ хангалттай цаг гаргаж тайван идэх хэрэгтэй. Мөн хоолыг 32 удаа зажилж идвэл хамгийн үр ашигтай гэж Америкийн мэргэжилтнүүд зөвлөж байна.

Мөн хоолоо гэнэт хасаж, хэт бага идэх нь жин хасах үйл явцад сөргөөр нөлөөлдөг. Иймд та өөрийн биеийн онцлогтоо тохируулан уураг ихтэй хүнсийг зохих хэмжээнд нь хэрэглэж хэвшээрэй.

Эрүүл мэндийн шалтгаан

Бамбай булчирхайн гипертиреодизм, өндгөвчний олон уйланхайт хам шинж (PCOS), чихрийн шижин, бөөрний аливаа өвчлөлүүд, стресснээс үүддэг күшингийн хам шинж зэрэг өвчнүүдээс шалтгаалж хэт их жин нэмэх тохиолдол их байдаг. Түүнчлэн сэтгэл гутрал, нойргүйдэл зэрэг сэтгэл зүйн өвчлөлүүд ч жинд нөлөөлдөг. Энэ тохиолдолд та зайлшгүй эмнэлэгт хандан, мэргэжилтнүүдээс зөвлөгөө авах шаардлагатай.

Эх сурвалж: Healthline, WebMD

Share on Facebook Share on Twitter